رانيا يوسف تتحدي الجميع بشأن لبسها في مهرجان القاهرة

أعربت النجمة رانيا يوسف عن تعجبها من قرار النجم حسين فهمي رئيس مهرجان القاهرة السينمائي الدولي بارتداء الملابس الرسمية خلال فترة المهرجان.

قالت رانيا يوسف: "مستغربة بس هنعمل اللى يريحهم، ما دام اللبس هيكون فورمال، فسبوني أخترع ليكم بدلة ومش هتبقى أي بدلة هتبقى بدلة باسم رانيا يوسف، وانتظروا بدلتي في الدورة الجديدة المليئة بالمفاجآت"، حسب تصريحاتها لموقع "القاهرة 24".وكان حسين فهمي كشف عن شكل الزي الرسمي في دورته الـ 44 المنتظر إقامتها في الفترة من 13 إلى 22 نوفمبر المقبل.

وقال حسين فهمي إن مهرجان القاهرة السينمائي الدولي ضمن مهرجانات الفئة الأولى، موضحا: "لما جيت المهرجان لقيت أن كل واحد بيلبس اللي هو عايزه، أنا لما حد بيجيلي البيت مش هستقبله بالبيجاما، هلبس كويس والستات تلبس لطيف".وأضاف رئيس المهرجان: "للأسف الشديد الأمر تطور لأكثر مما كنت متخيل، وبقى (وريني يا حبيبتي الفستان طيب لفي كده.. مين اللي عامل التسريحة واسمه أيه الكوافير؟)، مش ده المهرجان".

وأكد حسين فهمي: "لازم كلنا نبقى ملتزمين بالملابس الرسمية بتاعة كل المهرجانات الدولية، ألان ديلون لما جه المهرجان كان جاي بالبدلة السموكنج على كتفه، ده عادي واللبس اللي إحنا بنتفق عليه دوليا".

واختتم رئيس مهرجان القاهرة السينمائي الدولي تصريحاته قائلا: "نفس الزي الرسمي هيبقى موجود، والناس هتلبس كويس وتبقى شيك وهيبان إنه مهرجان قيم جدا".

وكانت رانيا يوسف ارتدت فستانا أسود اللون بدون بطانة أثار الجدل والانتقادات، في ختام مهرجان القاهرة لعام 2018.