راغب علامة يكشف سر غريب ومضحك لرفض والدته اتجاهه للغناء وكيف تحايل عليها

تحدث الفنان اللبناني راغب علامة عن تفاصيل جديدة من حياته الشخصية والفنية في لقاء مع أولى حلقات برنامج "أنغام" والذي تقدمه الفنانة المصرية أنغام عبر ‏قناة "‏dmc‏".‏

في بداية اللقاء رحبت أنغام براغب قائلة: "مفيش بداية أحلى من كدة، أنت عندك الغنا السهل الممتنع، فيه ‏حاجات حلوة كتير بتطلع بمنتهى السلاسة، بتقدر تربط بين حياتك والمزيكا، ودخلت قلبي من أول غنوة".‏

وتحدث راغب عن كواليس تلحينه لأغنية ياريت فيي أخبيها، حيث قال: ياريت في أخبيها لحنتها وأنا نايم، ‏كان معايا الكلام، والشاعر كان مصر إني ألحن، قولتله مش بلحن، قالي أنت شخصيتك لازم تلحن، ‏فحاولت، وابتديت ألحن، وكان معايا شريط صغير، وأسجل وكنت أروح أسمع، وتاني يوم نفس الموضوع.‏

وتابع راغب علامة: لغاية في يوم بقبرص، وبقيت خجول من الشاعر علشان معرفتنش ألحن لفترة، روحت ‏نمت وأنا متضايق، صحيت لحنتها وغنيتها وأنا نايم على المخدة بالمزيكا، وسجلت على طول وعملت كل ‏حاجة، ومكنتش عايز أكسفه وأكسف نفسي، ومكنتش بفكر في التلحين، والشاعر جابلي أغنية تانية علشان ‏ألحنها، وقلبي عشقها من أكتر الأغاني اللي عاشت ومش بتموت، ولحنتها في ثواني، وكانت كلماتها ‏مختلفة.‏

واستكمل: "أنا كل حاجة في حياتي بسيطة، وربنا مديني حاجات في صوتي هي البساطة الصعبة، ومش بتتقلد، ‏ومحدش بيعرف يقلدها، وبتصرف في حياتي بكل بساطة، البساطة هي الجمال في الحياة.‏

وكشف علاقته بالغناء منذ الصغر، وموقف عائلته من اتجاهه للغناء، قائلاً: "أبويا كان بيلعب عود وكنت ‏براقبه، لما كان عندى 18 سنة درست في الكونسرفتوار، واتعلمت غنا شرقي، أهلي مكانوش عايزني أغني، ‏خاصة والدتي، وكانوا على قد الحال ومش قادرين يعلموني، ووالدتي كانت خايفة عليا، وقالتلي خليك دكتور ‏أو مهندس أحسن، قلت لأمي أوعدك تشوفي حالك فيا".‏

وعن شعوره عندما كان عضو لجنة التحكيم في أحد البرامج، قال: "كل مشترك بيقف قدامي بفتكر نفسي، ‏بحط نفسي جواهم، وكنت متعاطف مع المتسابقين، حتى اللي مش بينجحوا بكلمهم بطريقة مختلفة علشان ‏ميزعلوش، والحمد لله اتوفقت في البرنامج، وعدى عليا حاجات كتيرة، اتعودنا نعيش في مصر، عايش في ‏مصر".‏

وأضاف: "اللي بعنا أغنية لكل حد عارف قيمته ومش بيخاف من اللي بيبعه، ومن الأغاني المقربة إلى قلبي.‏

وتحدث راغب عن أن مجموعة كبيرة من أغانيه ظلمت بسبب التريند، قائلاً: "أنا من كتر الحاجات اللي ‏عملتها، بقدّر أي حد يخليني أعمل حاجة جديدة، وفيه أغاني اتظلمت علشان الناس بتختار الأغنية اللي ‏تعجبها، وكل وقت ليه أغاني معينة، ونوع مزيكا معين، أساسًا إحنا نجحنا لأن الأغنية بالنسبالنا حياة، ‏وبنعمل الأغنية بحب، وبغيّر من طريقة غناء الأغاني على المسرح، ومش بيعجبني أي حاجة بغنيها، بحب ‏أوصل العمل للناس بشكل ممتاز، علشان بيبقى فيها روح، ويعجب الناس".‏

وأوضح راغب علامة: "في أحد اختبارت الغناء، رحت أدور على حاجة مميزة علشان أغنيها، وقلت لو عايز ‏أغني لعبد الحليم مش هبقى عبد الحليم، هو واحد بس، وكان في واحد صاحبي كان بيسمع أغنية للريس ‏متقال، وغنتها قدام لجنة التحكيم، وكانوا بيرقصوا كلهم، وطلعت الأول.‏

آخر أعمال راغب علامة

وتعد أغنية استمارة 6 هي آخر أعمال الفنان راغب علامة، الذي أصدرها عبر حسابه الرسمي بموقع الفيديوهات يوتيوب، ونجحت الأغنية في تحقيق نجاح كبير، إذ تصدرت تريند مواقع التواصل الاجتماعي، ونجحت في تحقيق مشاهدات وصلت إلى 22 مليون مشاهدة.

نصر زايد

صحفي متعدد المواهب، يعمل في كتابة المقالات والأخبار في مجالات متنوعة مثل السياسة، الاقتصاد، الثقافة، والرياضة.

قم بمشاركة المقال